அக்டோபர் 18, 2015

வலைப்பூ நமது தொடக்கமென்றால் முடிவு விக்கிபீடியாவில் இருக்கட்டும்

2015 வலைப்பதிவர் விழாவில் சிறப்பு விருந்தினராக பங்கு பெற்ற விக்கி மீடியா-இந்தியா திட்ட இயக்குநர் திருமிகு அ. இரவிசங்கர் அவர்கள் விக்கிபீடியாவில் எழுதவதற்கும் வலைப்பூக்களில் எழுவதற்கும் உள்ள வேறுபாட்டை எடுத்துரைத்தார்.   வலைப்பூக்களில் எழுத எல்லையற்ற சுதந்திரம் இருக்கிறது.  யார் வேண்டுமானாலும் எதை வேண்டுமானாலும் எழுதலாம்.  விக்கிபீடியா களஞ்சியம் ஒரு முறைபடுத்தப்பட்ட அமைப்பு.  எப்படி பின்னூட்டங்கள் வலைப்பூவின் ஆசிரியர் மட்டறுத்தலுக்கு (comment moderation) பின் வெளியிடப்படுகிறதோ, விக்கிபிடீயாவில் எழுதப் படும் கட்டுரை அதன் தர நெறிமுறைகளுக்கு இருந்தால் மட்டும்தான் வெளியிடப்படும்.  வலைப்பூவின் ஆசிரியர் தன் சொந்த விருப்பு வெறுப்புகளை வைத்து எந்தெந்த பின்னூட்டங்கள் வெளிவர வேண்டும் என முடிவெடுக்கலாம்.  விக்கிபிடீயாவில் கட்டுரைகளை நெறிபடுத்தும் வல்லுனர் குழு பெரும்பாலும் நன்கு கற்றறிந்த சான்றோர்களாகவே இருக்கின்றனர்.  விக்கிபிடீயாவில் எழுதும் அறிஞர் பெருமக்களுக்கு  முனைவர். ஜம்புலிங்கம் ஐயா போன்றவர்கள் சிறந்த எடுத்துக்காட்டு.

பதிவர் அறிமுகத்தில் இணையம் ஒரு பெரும் குப்பை என்றேன்.  பதிவர் அறிமுகம் என்கிற பகுதியில் வேறு செய்திகளைப் பேசுவது முறையில்லை என்றாலும், இணையத்தேடலில் தமிழின் நிலை அதிகமானவர்களுக்கு எடுத்துரைக்க வேண்டும் என்றே சொன்னேன்.  ஒருவேளை இந்த பதிவு முன்னமே எழுதியிருந்தால் அதையும் பேசியிருக்க மாட்டேன்.  மற்ற பதிவர்கள், விழாக் குழுவினர் மன்னித்தருள வேண்டும். 

இந்தப் பதிவின் முன்னோட்டத்தை வலைப்பதிவர் திருவிழா காணொளியில் 01:21:30 லிருந்து 01:23:30 வரை காணலாம்.


எழுத்தாளர் திருமிகு எஸ். ராமகிருஷ்ணன் உரையாற்றுகையில் நூலகத்தில் ஒன்றைத் தேடிப் படிப்பதற்கும் இணையத்தில் தேடிப் படிப்பதற்கும் நிறைய வேறுபாடு இருப்பதாகக் கூறினார்.   இணையத்தில் ஒன்றைத் தேடும்போது பெரு வெள்ளத்தில் அடித்து வரப்படும் செத்தை, குப்பை போன்ற அனைத்தையும் அள்ளி வரும்.  கழனிகளை செம்மைபடுத்தும் கனிமங்களும் அதில்தான் வருகிறது.  எல்லாவற்றையும் வலைப்பூவில் எழுத வேண்டாம் என்றும், மின்னூலாகவும் எழுதுங்கள் என்ற வேண்டுகோளை விடுத்தார்.

மாணவர்கள் மத்தியில் விக்கிபீடியா போன்று மின்னூல்கள் இன்னும் சென்றடையவில்லை.   சிலேட்டு பலகைக்கு மாற்றாக ஐபேட், ஆண்டராய்ட் டேப்லட் போன்றவை பெருகும்போது மின்னூல்களின் தேவையும் அதிகரிக்கும்.  அதுவரை மின்னூல் என்றால் நமக்கு அமேசான் கிண்டுலும் (இது ஒரு டிஜிட்டல்/மின்னூல் புத்தகங்களை படிக்கக் கூடிய சாதனம்) ePubம் நினைவிற்கு வராது, நம்மை பொறுத்தவரை கணினியில் சேமித்து பின்னர் படிப்பதற்கு உதவும் pdf கோப்பே மின்னூல்.

மின்னூலாக வெளியிடுவதில் உள்ள குறை, வலையில் இன்று அனைவராலும் ஏற்றுக் கொள்ளப்பட்ட ஒருங்குறி தகுதரம் (யுனிகோடு UTF-8, UTF-16) போன்ற ஒன்றை பயன்படுத்தாவிட்டால் அதில் தகவல்களை தேடிப் படிப்பது சிரமமாகிவிடும்.   நீங்கள் ஒரு pdf மின்னூலை உருவாக்க உங்களிடம் இருக்கும் ஏதோ ஒரு அழகான எழுத்துருவை பயன்படுத்துவீர்கள்.  நான் ஒன்றை பயன்படுத்துவேன்.  இதில் தகவல் தேடலுக்கான ஒருமித்த மென்பொருளை யார் எழுதுவது?  உங்களிடம் இருக்கும் தமிழ் pdf நூல்களை தேடிப் பாருங்கள், உணர்ந்து கொள்வீர்கள்.  

இணையத்தில் தமிழில் படங்களை ( தமிழில் வெளிவந்த திருட்டு விசிடி புதுபடமென நினைத்துக் கொண்டால் வருந்துகிறேன் : ) தேடும் நிலை குறித்த அருமையான கட்டுரையை கீதமஞ்சரி வலைப்பூவில் படிக்கக் கோருகிறேன்.

வலைப்பதிவர் திருவிழாவிற்காக தமிழ் இணையப் பல்கலைகழகம் நடத்திய போட்டியில் பரிசு பெற்ற கட்டுரை
தேடுவோம் கண்டடைவோம் http://geethamanjari.blogspot.in/2015/09/blog-post_28.html

இனி எழுத்து விளக்கங்களை விட, ஓராயிரம் பக்க விளக்கங்களை மௌனமாக விளக்கும் சில படங்களைக் காண்போம்.

கூகிள் தேடலில் அக்டோபர் 18, 2015 அன்று எனது தேடலுக்கு விடையாகக் கிடைத்தவை.

எச்சரிக்கை:  கீழுள்ள படம் மிகுந்த ஆபாசமான தேடல் விடையைக் கொண்டது. 
அம்மா, அந்த களங்கமில்லாத சொல்லிற்கும் சகிக்க முடியாத ஆபாசத்தை ஊட்டிய வலைப்பதிவுகளின் தொகுப்பு.  மாணவர்கள், தாய்மார்கள் படத்தை பெரிது படுத்தி பார்ப்பதை தவிர்க்கவும்.



Sponsored content.  முதல் பக்கங்களில் வரும் தேடல் விடையனைத்தும் நாம் தேடுபவையாக இருக்காது.  ஆங்கிலத்தில் தேடுவதும் இதற்கு விதிவிலக்கல்ல.  தமிழில் தேடுவதைவிட ஆங்கிலத்தில் தேடுபவை பரவாயில்லை.


விக்கிபீடியாவில் உள்ள கட்டுரைகளை தேடல் பொறிகள் முன்னிலைப் படுத்தும்.  நல்ல கட்டுரைகளை விக்கிபீடியாவில் எழுதுவோம்.


விடைகள் எப்படி வருகிறதேன்று விக்கிபிடீயாவை தேடிப் பார்ப்போம்.  அடடா, அடடா அற்புதம்!!!



முதலில் விக்கிபிடீயாவில் தேடு என தேடல் பொறிக்கு அறிவுருத்தலாம்.  அட இது கூட நல்லாதான் இருக்கு.



அறுவருப்பான தேடல் விடைகளால் நாம் நொந்து கொள்ள வேண்டியது தேடல் பொறிகளை அல்ல.  தேடல் பொறிகள் இணையத்தின் கொடை.  நல்ல தேடல் விடைகள் வர நல்ல நல்ல பதிவுகளை அதிகம் பதிவிடுவோம்.   தனிமத தாக்குதல்களையும், சாதி சமய பிரிவினைகளை ஏற்படுத்தும் வலைதளங்களையும், காமத்தை கொச்சை படுத்தும் தளங்களையும் புறக்கனிப்பதன் மூலம் நம்மால் ஆன சிறிய பங்களிப்பை செய்ய முடியும்.  பெரிய பங்களிப்புக்கு விக்கிபிடீயாவில் எழுதலாம்.


- வாழ்க வளமுடன்

பதிவர்களுக்கும் வாசகர்களுக்கும் ஓர் அன்பு வேண்டுகோள்

புதுக்கோட்டையில் இனிதே நடந்து முடிந்த பதிவர் சந்திப்பு 2015 விழா குறித்து அனேக பேர் தத்தம் வலைப்பூவில் குறிப்பிட்டிருப்பீர்கள்.  தங்களால் இயன்ற நன்கொடையும் அனுப்பி வைத்திருப்பீர்கள்.  விழா பிரமாண்டமாக நடந்தது என்பது கலந்து கொண்டவர்களுக்கும், காணொளியை (வீடியோ) இணையத்தில் கண்டவர்களுக்கும் சொல்லித் தெரிய வேண்டியதில்லை.



இணையத்தில் அண்மை காலமாக பதிவுகளைப் படிக்காத நிறைய பதிவர்களுக்கு இப்படியொரு விழா நடந்ததே தெரிய வாய்ப்பில்லை.   விழா தொடங்குவதற்கு முன்னர் விழா அழைப்பிதழ்களை நம் வலைப்பூக்களில் ஒட்டி மகிழ்ந்தோம்.  விழாவிற்கான செலவு வரவைவிட அதிகமானதால்,  மன்னிக்கவும்.  செலவைவிட வரவு குறைவானதால் உரிமையுடன் விழாக் குழுவினர் நம் உதவிகளை நாடுகின்றனர்.   நம்மால் ஆன சிறு துரும்பு உதவியாகினும் செய்வதில் மகிழ்ச்சி கொள்ளலாம்.

குசும்பு:  பதிவர்களின் உரிமையை மீட்க கட்சி ஆரம்பித்தாலும் வியப்புற ஒன்றுமில்லை

  


விழா குழுவினர்கள் அல்லும் பகலும் விழாவுடைய வெற்றிக்காக உழைத்திருக்கிறார்கள்.  ஒரு சில குறைகளென அவரவருக்கு தோன்றினாலும், ஒரு நிமிடம் சொந்த விருப்பு வெறுப்பையெலாம் ஒதுக்கிப் பார்த்தால் நமது குறை பெரிதாகவே தெரியாது.   குறை என்ற ஒன்று சொல்ல வேண்டுமே என்பதர்க்காக சொல்கிறேன், கலந்து கொண்ட அனைவருக்கும் இருந்த பெரிய குறை ஒருநாள் போதாது என்பதே அது.   ஒரு நாளைக்கே, அனைத்தையும் செம்மையுற செய்ய எவ்வளவு திட்டமிடல், உழைப்பு, அவரவர் நேரம், நிதி அத்தனையும் வேண்டும் என்பதை எண்ணிப்பார்க்க வேண்டும்.  முதல் நாளே சென்றதால் ஒரு சில ஐயப்பாடுகள் விழாக் குழுவினரிடம் இருந்ததை அறிந்து கொள்ள வாய்ப்பு கிடைத்தது.  அனைவரையும் மேடையேற்ற நேரமிருக்காது என்பதே அது.  அதற்கு அவர்கள் கண்ட முதல் தீர்வு விழா குழுவினர்களுக்கு அறிமுகம் தேவையில்லை எனும் தீர்மானம்.  பதிவர் அறிமுகத்தில் ஒவ்வொருவரும் ஒரு நிமிடம் எடுத்துக் கொண்டால் கூட (300 நிமிடங்கள்) பதிவர் அறிமுகத்துக்கே 5 மணி நேரம் போதாது.  நான் எனது அறிமுகத்திற்கு மேடையில் இரண்டு நிமிடம் எடுத்துக் கொண்டேன் என்பது வேறு சேதி (ச்சை இதெல்லாம் ஒரு பொழப்பு… திட்டுங்க வாங்கிக்கிறேன்).



விழா குழுவினரில் பலர் வேலைக்கு விடுப்பு எடுத்து, சொந்த அலுவல்களையெலாம் ஒதுக்கி வேலையை அல்ல, சேவையை செய்திருக்கிறார்கள்.

சனிக்கிழமை இரவு திண்டுக்கல்லில்  இருந்து வந்திருந்த தனபாலன் ஐயா (திண்டுக்கல் புதுக்கோட்டைக்கு அருகாமை மாவட்டமோ இல்லையோ, அந்த ஊர் பெரியவர் ஒருவர் :) அனைவர் மனதிற்கும் அருகாமையில் இருப்பவர்) அவரிடம் கேட்டேன் “என்ன காலையிலேயே வந்துட்டீங்களா???”, “யப்பா, அவரு நேத்தே வந்துட்டாருப்பா..” என ஒரு குரல்.


முதல் நாள் இரவு விழாக் குழுவினரின் மொத்த கவலையும், அனைவரையும் திருப்தி படுத்துவது எப்படி என்ற கேள்வியாகவே இருந்தது.  நம்மில் ஒருவராலும் எல்லோரையும் நிறைவு செய்ய இயலாது.  அதற்கு முயற்சித்தால் தோற்று விடுவோம் என்பது வாழ்க்கை விதி.



கையேட்டிற்கு எழுதி அனுப்பிய தகவல்கள், கையேட்டில் இடம் பெறவில்லை என ஒருவர் (ஒருவரல்ல, இன்னும் பலர்) வருத்தம் கொண்டிருந்தார்.  இரத்திணச் சுருக்கமாக இருந்த குறைந்த அளவு அறிமுகத்திற்கே இவ்வளவு பக்கங்கள் வந்திருக்கிறதென்றால், நீட்டி இழுத்திருந்தால் தயாரிப்பு செலவுகள் இன்னும் ஏறியிருக்கும்.

போனது போகட்டும், விழா அழைப்பிதழ்களை பதிவேற்றிய நாம் விழாவிற்கான நன்கொடை அழைப்பையும் நம் வலைப்பூக்களில் பகிர்வோம்.

 படம் பார்த்து கதை சொல்லவும்.





கீழ்க்காணும் HTML வரிகளை தங்கள் வலைப்பூவில் சேர்த்துக் கொள்ளவும்
<a style="font-size:13pt" href="http://bloggersmeet2015.blogspot.com/2015/10/blog-post_15.html">
 வலைப்பதிவர் திருவிழா - 2015</a>

<a href="http://bloggersmeet2015.blogspot.com/2015/10/blog-post_17.html">
    <img src="http://1.bp.blogspot.com/-y5ub3IXIFZI/Vh6ymRXIV3I/AAAAAAAAFR8/rFR982fpnW8/s1600/Guide%2Bwrapper.jpg"/>
</a>
 
நமது வலைப்பூக்களால் பயன் பெற்ற ஓரிருவர் பதிவர் கையேட்டை வாங்கினால் கூட, அடுத்த வருட விழா இன்னும் சிறப்பாக இருக்கும்.  அடுத்த வருடம் போட்டி போட்டுக் கொண்டு எந்த மாவட்ட (மாவட்டம் என்பதைவிட மண்டலம் என்பது மிக பொருந்தும்) பதிவர்கள் உழைக்க போகிறார்களோ தெரியவில்லை, ஆனால் வெற்றிகரமாக நடந்தி முடித்தவர்கள் சோர்வடைந்தால்… ச்சே நாமெல்லாம் என்னதுக்கு பதிவு எழுதுறோம் இல்ல வாசிக்கிறோம் (வசிக்கிறோம் குறில் அல்ல, வாசிக்கிறோம் நெடில்)

ஜூன் 24, 2015

Compiler தெரியும், அதென்ன Transpiler?


Compiler, Interpreter பற்றி கணினி பாடத்திட்டத்தில் ஏற்கனவே படித்திருப்போம்.  Transpilerரும் ஒருவகையான compilerதான்.  ஆனால் இரண்டும் எவ்வாறு வேறுபடுகிறதெனத் தெரிந்து கொள்வோம்.
Interpreter என்பது ஒரு புரோகிராமிங் மொழியை கணினிக்கு ஏற்றவாறு ஒட்டுமொத்தமாக மாற்றாது.  Interpreted மொழிகள் மனிதன் புரிந்து கொள்ளும் நிலையிலேயே (human friendly, not machine friendly) வெளியிடப்படும்.  Interpreterரில் இயங்கும்போதுதான் ஒவ்வோரு வரியாக கணினிக்கு ஏற்றவாறு மாற்றம் கொள்ளும்.  Javascript, Visual Basic, VBScript, MATLAB, Perl, PHP, Python, Java Byte code (ஜாவா மொழி முதலில் compile செய்யப்பட்டு பின்னர் JVMல் interpret செய்யப்படுகிறது ) போன்ற மொழிகள் Interpreted நிரல் மொழிகளுக்கு எடுத்துக்காட்டு.

hello.vbs (create and save in notepad, just double click to run) 
msgbox "hello... I m running n a interpreter"
















Compilerரின் வேலை மேல்நிலை புரொகிரமிங் மொழியை (high level) கணினிக்கு ஏற்றவாறு கீழ்நிலை மொழியாக (low level) மாற்றுவது.  C, C++, Java (compiles to Byte code), C#, GO போன்ற நிரல் மொழிகள் compiled மொழிகளுக்கு எடுத்துக்காட்டு.


Transpilerரும் ஒரு நிரல் மொழியை மொத்தமாக மற்றொரு மொழியாக மாற்றும் மென்பொருள் உருவாக்கக் கருவிதான்.  என்ன வேறுபாடென்றால் Compiler மேல் நிலை மொழியை தன்னைவிட கீழ் நிலை மொழியாக
மாற்றும்.



ஆனால் Transpiler மேல் நிலை மொழியை அதன் சம நிலையிலேயே உள்ள மற்றொரு நிரல் மொழியாக மாற்றும் எடுத்துகாட்டிற்கு Coffeescript என்பது மேல்நிலை நிரல் மொழி (Scripting language).  Coffescriptல் எழுதும் நிரலை Coffeescript transpiler வேறொரு மேல்நிலை மொழியான Javascriptடாக மாற்றி விடும்.  Javascriptடை வெளியீடாகக் தரும் ஏகப்பட்ட Transpilerகள் இருக்கிறது.  மைக்ரோசாப்ட் உருவாக்கிய TypeScript மொழியும் Javascriptடாக transpile செய்யப்படும்  ஒரு மொழிக்கு நல்ல எடுத்துக்காட்டு.

சில மொழிகளில் எழுதப்பட்ட நிரல்கள், அந்த மொழியின் புதிய பதிப்பிற்கு மாற்றம் செய்யும் போது நிறைய பிரச்சனைகள் வரும் (backward compatability இருக்காது).  இதை தவிர்க்க அல்லது ஓரளவாவது சரிசெய்ய அந்த மொழிகளின் transpiler toolகளைப் பயன்படுத்தலாம்.  எடுத்துகாட்டிற்கு Python2ல் செய்த நிரலை 2to3 transpiler கருவி மூலம் Python3 syntaxசிற்கு மாற்றிக் கொள்ளலாம்.

Transpilerருக்கு இணையான கலைச்சொல் ஒன்றை அன்பர்கள் பரிந்துரைக்கவும்.

Compiler    -  நிரல்மொழி மாற்றி என வைத்துக் கொண்டால்
Transpiler  -  இணைநிலை நிரல்மொழி மாற்றி என்பது பொருந்துமா!

பிப்ரவரி 08, 2015

IT நிறுவனங்களில் கேள்விக்குறியாகும் தனியுரிமை (PRIVACY Rights Violation)

சந்திரமுகி படத்தில் ரஜினியை பார்த்து வடிவேல் கேட்பார் “பேய் இருக்குன்னு சொல்றாங்களே, அத நம்பலாமா கூடாதா? அது வர அறிகுறி ஏதாவது இருக்கா?”.  அதைப் போன்ற ஒரு சீரியஸான கேள்வி ஒன்றை என் நண்பர் என்னிடம் கேட்டார் “சிலபல IT MNC கம்பெனிகள் செல்போன் அழைப்புகளையும்,  நடைபாதை, உணவகம் Cafeteria எனக் கம்பெனி எல்லைக்குட்பட்ட அனைத்து இடங்களிலும் பேசுவது அனைத்தையும் அத்துமீறி ஒட்டுக் கேட்பதாக சொல்கிறார்களே அது உண்மையா? இல்லையா?”. 

உங்களுக்கு ஏன் இந்த தீடீர் சந்தேகம் என்றேன்.  இல்ல இல்ல தீடீர் சந்தேகமெல்லாம் இல்லை, நான் பேப்பர் போட்ட (Resign செய்த) நாளிலிருந்து என்னை இந்த கேள்வி துரத்துகிறது என்றார்.  ஏன் அப்படி எனக் கேட்டேன்?  திருவான்மியூர் ஹோட்டலில் நண்பருடன் போன் பேசியது அடுத்த ஐந்தாவது நிமிடத்தில் தரமணியில் உள்ள அலுவலகத்துக்கு எப்படித் தெரியும் என்றார்.   சாப்பிட்டு முடித்து திரும்ப அலுவகத்தில் நுழைந்த அடுத்த நிமிடம் தான் பேசிய பேச்சுகள் அனைத்தும் வெளியரங்கமாகவே மீள் பேசப்படுகிறது (ஹிண்ட்) என்றார்.   போன் பேசும்போது மட்டுமல்ல சாதரணமாக கம்பெனிக்கு வெளியில் உரையாடுவது கூட அவர்களுக்கு உடன் தெரிய வருகிறது என அடுத்த குண்டை தூக்கிப் போட்டார்.

கொஞ்சம் விரிவாத்தான் சொல்லுங்களேன் என்றேன்
சென்னை Fashion technology institute பக்கத்தில் இருக்கும் பாலத்துக்கு அடியில் நண்பருடன் சகஜமாக உரையாடியதை கம்பெனிக்குள் இருப்பவர்கள் எவ்வாறு லைவ்வாக கேட்டனர் எனக் கேள்வி எழுப்பினார்.  சாதாரணமாக உணவு இடைவேளையில் நண்பருடன் கம்பெனிக்கு சற்று வெளியில் பேசியது கம்பெனிக்குள் இருக்கும் கனவான்களுக்கு உடனே எப்படித் தெரியும் எனத் தன் தலையே வெடித்து விடும் போலிருந்ததாகச் சொன்னார்.  அப்புறம் என்ன செய்தீர்கள் எனக் கேட்டேன்.  ஓரளவு நல்ல புரோகிராமரான அவர் எதையும் எவரிடமும் வெளிக்காட்டிக் கொள்ளாமலேயே blood testஐ தவிர்ந்து unit testing, psychology testing என நூற்றுக்கும் அதிகமான பல மாதிரி சாம்பிள்களைக் கொண்டு மனிதர் சோதித்திருக்கிறார்.  சோதித்த வரை  இவை அனைத்தும் அப்பட்டமான உண்மை எனத் தெரிந்தவுடன், ஆள விடுங்கடா சாமியென துண்டக் காணோம் துணியக் காணோமென ITயை விட்டே விலகி எங்கோ காட்டுக்குள் ஓடி விட்டார்.

நானும் Jouve India (STPI Park, Taramani-Chennai), Global Software Resources (Bhawan IT Park, Thuraipakkam-Chennai), Photon Interactive (DLF IT Park, Porur-Chennai)  ஆகிய நிறுவனங்களில் விசாரித்துப் பார்த்து உண்மைதான் எனத் தெரிந்து கொண்டேன்.

வேலையில்லா பட்டதாரி படத்தில்   நீ இங்க வந்து பேசினது etc..etc... அத்தனையும் ரெக்கார்ட் ஆயிருக்கு.....என ஒரு காட்சி வரும்.  அதில் ஒன்றை யோசித்தீர்களா.  உங்கள் நடவடிக்கைகளை கேமரா மூலம் ரெக்கார்ட் செய்யலாம்.  பேசுவதை எப்படி ரெக்கார்ட் செய்ய முடியும்.  கம்பெனிகளில் இருக்கும் கேமராக்களில் வீடியோ மாத்திரம் பதிவாகுமே தவிர ஆடியோ அல்ல.  அப்படியெனில் கூட ஒரு மைக்கும் வைத்திருந்தால் சாத்தியமிருக்கிறது.  இதில் எங்கு இடிக்கிறதென்றால் பெரிய IT பார்க்கில் பல நிறுவனங்கள் இருக்கும்.  கம்பெனிக்கு வெளியில் பேசும் அனைத்தையும் ரெக்கார்ட் செய்வதற்கு சாத்தியம் குறைவு.  அப்படியே பேசினாலும் கசாமுசா கசாமுசா என கேட்டால் track செய்து ஒரு புண்ணியமும் இல்லை.  நீங்கள் போகுமிடமெல்லாம் கையில் மைக் போன்ற எதையேனும் கொண்டு சென்றால்தான் உண்டு.  

 நாம் போகுமிடமெல்லாம் கூடவெ எடுத்துச் செல்லும் மைக் நமது செல்போனிலேயே இருக்கிறதென்பதை மறவாதீர்.

அஞ்சாதே, ரமணா போன்ற படங்களில் காட்டுவதெல்லாம் அதர பழைய டெக்னாலஜி.  எதிர்முனையில் பேசுபவன் யார் என்று தெரியாததால் ரெக்கார்ட் செய்து எந்த நம்பரில் வந்தது, குரலுக்கு சொந்தக்காரன் யார் என்றேல்லாம் ஆராய்கிறார்கள்.  அலுவலக ஒட்டுக் கேட்பு கருவியில் மிக நேர்த்தியாக ஸ்பீக்கரிலேயே லைவ்வாக கேட்டுக் கொள்ளலாம்.  நீங்கள் பணிக்கு சேரும்போதே உங்கள் முழு ஜாதகத்தையும் கொடுத்து விடுகிறீர்கள்.

 சிக்னல் கம்யூனிகேஷனில் காப்புரிமை வாங்கியதெல்லாம் அவ்வளவு எளிதாக வெளி வராது (இதற்குத்தான் open source, open hardware, open medicine போன்றவை தோன்றின என்பதையும் கருத்தில் கொள்ளவும்).

அனைத்து வைக்கப்பட்ட செல்போன்களும் (even switched off mobiles) ஒட்டுக் கேட்பதிலிருந்து தப்ப முடியாது.  இந்த தொழில்நுட்பங்கள் அண்மையில் கண்டுபிடிக்கப்பட்டவை இல்லை.  என்பதுகளிலேயே இது போன்ற தொழில்நுட்பம் உருவாக்கப்பட்டுவிட்டதென்றால், தற்போதைய வெளிவராத தொழில்நுட்பங்கள் குறித்து அறிந்தால் ரிச்சர்ட் ஸ்டால்மேனைப் (மாபெரும் மென்பொருள் மேதை) போல நம் செல்போன்களை தூக்கி எறிந்து விடுவோம்.
Roving Bug technology:  Spies your conversations through your normal personal mobile phone
http://en.wikipedia.org/wiki/Covert_listening_device
மேலுள்ள விக்கிபிடியா ஆங்கில கட்டுரையை எவரேனும் தமிழ் விக்கிபிடீயாவிலும் எழுதுங்களேன்...

செல்வத்துள் செல்வம் செவிச் செல்வம் அச்செல்வம்
செல்வத்துள் எல்லாம் தலை.

சரி, யாரையெல்லாம் உளவு செய்கின்றனர்

1.  வெளியில் வேறு பிராஜெக்ட் ஏதேனும் செய்கிறார்களா அல்லது வேறு வேலைக்கு முயற்சிக்கிறார்களா என சந்தேகம் ஏற்பட்டால்.

2.  Resignation போட்ட நாளிலிருந்து செய்ய வாய்ப்பிருக்கிறது.  ஏனெனில் Market trendஐ அறிந்து கொள்ள எளிய வழி.  நீங்கள் போகிற போக்கில் வேறு எவரையேனும் கூட அழைத்துச் செல்ல நினைக்காலாம். வெளியேறுவதற்கான உண்மையான காரணத்தை அறிந்து கொள்ளவும் ஆர்வம் அதிகமிருக்கும்.

3.  புதிதாக வேலைக்கு சேர்பவர்களை உளவு பார்ப்பதுதான் அதிகம் நடக்கிறது.   அவர்கள் வேலைக்கு ஆவார்களா என முடிவெடுக்க.
4.  நமது + -  தெரிந்து கொள்வதில்தான் அதிக இலாபம் இருக்கிறது.  தேவைப்பட்டால் வேண்டியதைக் கொடுத்து தக்க வைத்துக் கொள்ளலாம், தேவையில்லையெனில் பிடயிரைப் பிடித்து வெளியிலும் தள்ளலாம்.

ITயில் பணியாற்றும் உங்களுக்குத் தெரிந்தவர்களிடம் இவற்றைப்பற்றி விவாதிக்கத் தவற வேண்டாம்.  விழிப்புணர்வுடன் இருப்போம்.  காவல்துறை, அரசாங்க உளவுத்துறை தவிர்த்து (அவர்களே உரிய அனுமதி பெறாமல் செய்யக் கூடாது) மற்றவர்கள் அடுத்தவர் மொபைலை Track செய்வது சட்டப்படி குற்றம்.  இந்த வேலைகளைச் செய்பவர்கள் ஒத்துக் கொள்வார்களெனவா நினைக்கிறீர்கள்?!!!!!

எனது நலன் கருதியும் நண்பர்களின் நலன் கருதியும் பல செய்திகளை பதிவிடத் தவிர்த்திருக்கிறேன்.  இப்படியெல்லாம் நடக்கிறதென சொல்ல வேண்டிய அவசியம் எனக்கில்லை.  சொல்லாவிட்டாலும் எப்படித் தெரியும்?